Баспасөз орталығы

Қазақстанда азаматтардың қаржылық сауаттылық деңгейін арттыру бойынша «Қарызсыз қоғам» жобасын іске асыру жалғасуда. Жоба өткен жылдың сәуір айында басталып, содан бері 100 мыңнан астам адам оқудан өтті. Енді ұйымдастырушылар «Қарызсыз қоғам» түлектеріне жеке қосалқы шаруашылықтарды аграрлық кооперативтерге біріктіру арқылы табыстарын арттыруға көмектесуге ниетті.

Ол үшін «AMANAT» партиясы ҚР Қаржы нарығын реттеу және дамыту агенттігінің, Halyk Bank және «Банк Центр Кредит» қолдауымен «Қамқоршы AMANAT» қорының құрылғаны туралы хабарлайды. Тиісті меморандумға бүгін «AMANAT» партиясының атқарушы хатшысы Дәулет Кәрібек, ҚР Қаржы нарығын реттеу және дамыту агенттігі төрағасының бірінші орынбасары Нұрлан Әбдірахманов, Halyk Bank басқарма төрағасының орынбасары Ертай Сәлімов және «Банк Центр Кредит» вице-президенті Анастасия Овсянникова қол қойды.

«Қамқоршы AMANAT» қоры тілек білдірушілердің барлығы теориялық білім алып қана қоймай, ауыл шаруашылығының түрлі бағыттары бойынша практикалық дағдыларды игере алатын оқу-әдістемелік орталықтар үшін қаржыландыру көзі болады. Қатысушылар тәжірибелік зертханаларға, сондай-ақ «кілтке дайын» жобаларды іске асыруға арналған барлық құралға қол жеткізе алады. Бұдан басқа, құрылатын кооперативтерге өндірістік жабдықтар лизингке беріледі және қайтарылатын гранттар төленеді.

«Жамбыл облысының Меркі ауданында «Агросауат» атты алғашқы орталық ашылды. Ауданның ауыл шаруашылығын дамыту әлеуеті жоғары, тұрғындардың көпшілігінде шамамен 10 сотық жер бар. Көбісі бақша егеді, мал өсіреді, бірақ тек 1% ғана ауылшаруашылық өнімдерін сатады. «Қамқоршы AMANAT» қоры ЖҚШ-ны кооперативтерге біріктіріп қана қоймай, мал, тұқым бірыңғай сатып алу, машина-трактор станциялары ұйымдастырылатын, өнімді сертификаттауға және өткізуге көмек, қайта өңдеу жобаларын дамыту, сақтау қоймаларын салу және тағы көптеген басқалары жұмыс істейтін тұтас экожүйені құруға мүмкіндік береді», - деді «Қарызсыз қоғам» жобасының басшысы Ақмарал Бекмұрзаева.

Сондай-ақ, оқу-әдістемелік орталықтар ЖҚШ және кооперативтер нақты қандай тауарлар өндіруі керек екенін анықтау үшін әр ауданның және нақты ауылдың мамандануын анықтауға мүмкіндік береді.

«Қамқоршы AMANAT» қорын құру туралы бастамаға түсініктеме бере отырып, Halyk басқарма төрағасының орынбасары Ертай Сәлімов бұл өткен жылы Halyk Bank қаржылық қолдауымен басталған «Қарызсыз қоғам» жобасын іске асырудың жаңа тарауы болатынын атап өтті.

«Бізді Центркредит банкіндегі әріптестеріміз және нарықты реттеуші қолдағаны ерекше қуантады. Бұл қаржы секторы осы бағдарлама аясында атқара алатын және атқаруы тиіс маңызды рөлді бәріміздің түсінетінімізді көрсетеді», - деді ол.

Айта кету керек, «Қарызсыз қоғам» жобасы өткен жылдың 2 мамырында Қазақстанның 8 өңірінде пилоттық режимде басталып, мемлекет басшысының жоғары бағасына ие болды, содан кейін ол бүкіл елге таралды. Осы жылы жобаны іске асыруға екінші деңгейдегі банктер мен бейінді министрліктер қосылды. Сарапшылардың дәрістерінен басқа, жобаға қатысушылар enbek.kz порталында тіркеліп және ЖК ашудан бастап соттан тыс банкроттықты сүйемелдеу мен берешекті өтеу кестесін жасауға дейін сұрақтардың кең ауқымы бойынша кеңес алады. Сондай-ақ білім алушыларға заңгерлердің көмегі көрсетілетініне кепілдік беріледі. Олар әр қарыз алушының кредиттік тарихын жеке зерттейді және қарыз жүктемесін жеңілдету бойынша практикалық кеңестер береді.

Курстарға жазылу үшін qogamfin.kz сайтындағы нысанды толтыру қажет. Оқу 50 адамға дейінгі топтарда күндізгі форматта өтеді. Сабақтың ұзақтығы - 5 жұмыс күні.